Со претставата „Балкански мажи“ на МониКарт од Нови Сад, во Крива Паланка заврши 18. издание на Меѓународниот театарски фестивал „Св. Јоаким Осоговски“.
Последната фестивалска вечер донесе динамична и темпераментна претстава во која преку хумор, музика и препознатливи балкански ситуации се отворија теми за љубовта, односите меѓу мажите и жените, пријателството и секојдневието во кое, и покрај различностите, лесно се препознаваме.
Пред публиката во Крива Паланка настапи Моника Ромич, која со својата енергија и непосредност ја освои сцената, додека музичкиот сегмент на DJ Војислав Савиќ ѝ даде дополнителна динамика на целата вечер.
Со „Балкански мажи“ фестивалот ја заокружи својата годинашна приказна – исполнета со различни театарски естетики, гостувања од земјата и регионот, исклучителни актерски остварувања и пред сè, средби меѓу уметниците и публиката.
Во изминатите фестивалски денови, сцената во Крива Паланка беше место на кое оживеаја различни приказни, но заедничката нишка беше една – моќта на театарот да нè насмее, да нè замисли и да нè поврзе.
- издание на Меѓународниот театарски фестивал „Св. Јоаким Осоговски“ заврши, но фестивалските приказни остануваат во сеќавањето на публиката.
До следното фестивалско издание. 🎭
